Mga light ashfall kag sulfuric smell lamang ang naeksperyensyahan sang pila ka mga local government units sa Negros Occidental matapos sang Moderately Explosive Eruption sang Bulkan Kanlaon kahapon.
Ang nakabatyag lamang sang light ashfall amo ang Brgy Buluangan kag Quezon sa San Carlos City.
Samtang napanimahuan naman ang asupre sa Brgy Igmaya-an, Cod-Cod, Brgy 2, kag Brgy 3 sa San Carlos City; subong man sa Brgy Ma-ao sa Bago City.
Nagpatigayon naman sang preemptive evacuation sa pila ka pumuluyo sa Brgy Biak-na-bato, La Castellana.
Sa interview sang Bombo Radyo Bacolod kay Irene Bel Ploteña, head sang Negros Occidental Provincial Disaster Risk Reduction and Management Council, sa Negros Oriental sa karun ang pinaka-apektado sang ashfall, kun sa diin may mga reports na nga nagdangat pa sa Cebu, gani ginkanselar man ang mga flights.
Wala naman sang nareport nga pagluntad sang lahar flow.
