Ginpahayag ni Bacolod City Lone District Congressman Greg Gasataya nga “Brand of Service” ang igabilin sini nga legasiya sa pumuluyo.
Sa State of the District Address (SODA) sini sang Dominggo, suno sa kongresista hands-on kag nakahibalo ini sang iya trabaho ilabi na sa mga isyu kag problema nga ginhatagan man sini sang solusyon.
Suno diri, ginatutokan sini ang paghatag sang serbisyo ilabi na sa sektor sang edukasyon kag social services kaangay na lamang sa livelihood, medical kag burial assistance.
Dugang pa sini, malapit na lamang kag matapos na ang Bacolod Negros Occ Economic Highway nga makahatag sang benepisyo sa mga pumuluyo.
Samtang, sa ginpatigayon sini nga SODA, wala mahimo nga makatambong nanday Bacolod City Mayor Alfredo ‘Albee’ Benitez kag Bacolod City Vice Mayor El Cid Familiaran, apang yara naman sanday Councilor Jude Thaddeus Sayson, Al Victor Espino, Renecito Novero, Claudio Jesus Puentevella, Cindy Rojas kag Lady Gles Pallen.
Pahayag ni Gasataya, wala pa sila sang may naesturyahan sa Team Asenso nga plano sa 2025 elections apang nagpasalig naman ini nga may husto nga tion para diri.
9 out of 10 naman ang pag-rate ni Councilor Thaddeus “Thaddy” Sayson sa performance ni Congressman Greg Gasataya.
Suno kay Sayson, madamo sang nabuligan si Gasataya sa mga proyekto nga natigayon sini.
Kag ang mga napasar sini nga hagna ang nakabulig indi lamang sa ciudad sang Bacolod apang para man sa bug-os nga Pilipinas.
Dugang pa sini, iya man ginkalipay nga nagtupa kay Gasataya ang pagka-kongresista sa nakita sini nga ginhatag niya nga serbisyo.
