Pila ka mga anggulo ang ginalantaw sang Sipalay City Police Station nga motibo sa pagpatay sa anay miyembro sang Citizen Armed Force Geographical Unit (CAFGU) sa Brgy. Camindangan kahapon.
Ang biktima nga si Amid Panangganan, 44 anyos kag residente sang nasambit nga lugar ang nasapwan nga wala na sang kabuhi kahapon matapos gintiro sang apat ka wala pa nakilal-an nga mga suspetsado.
Sa interview sang Bombo Radyo kay Police Lt. Necerato Sabando, hepe sang Sipalay City Police Station, ginpahayag sini nga pasado alas 6:00 sang aga sang may nasugata nga apat ka mga lalaki si Panangganan samtang nagapadulong sa isa ka sugar cane plantation kag gilayon lang ini nga ginluthang.
Suno sa iya, may yara sang rekord ang biktima nga nanghold-up ini kag nakapatay man ini anom ka tuig na ang nakaligad gani ginalantaw ini nga mga anggulo sang kapulisan tuhoy sa motibo sang krimen.
Suno sa hepe, posible nga paryente sang mga nabiktima ni Panangganan ang mga suspetsado apang nagapadayon pa ang imbestigasyon sang kapulisan.
Nakuha sa crime scene ang .45 calibre pistol kag nakaangkon sang pilas sa nagakalain-lain nga parte sang kalawasan ang biktima.
