Nagsumiter na sang request ang Bacolod Traffic Authority Office (BTAO) sa Office of the Mayor kag gincopy furnish sa Sangguniang Panlungsod para sa rerouting sa palaabuton nga tigkalalag.
Nagalaom si BTAO Head P/Maj. Junji Liba nga sa ginpalagas sini nga request nga ma-calendar kag makapagwa sang resolusyon sa closure kag rerouting.
Ginalantaw sini nga magpatuman sang road closure kag rerouting sa Burgos Public Cemetery bangod sa ginalauman na ang madamo nga nagabisita.
Plano sang mga ini nga saraduhan gikan sa Lopez Jaena padulong sa Bacolod Police Station 4.
Sa rerouting, ang mga publik kag private vehicles ang mahimo makalabay sa fifth road sang Villamonte padulong sa Lopez Jaena-Gallo nga magalabay sa Megaworld.
Tanan nga mga salakyan gikan sa Gallo kag Lopez Jaena ang makalabay man sa sulod sang Megaworld lapos sa fifth road sa Barangay Villamonte kun padulong sa north direction ukon mahimo man magderetso sa Lopues East sa Circumferential Road kung padulong sa south direction.
Samtang ang mga apektado nga Public transport ang makalabay sa North Drive padulong sa Villamonte kag magagwa sa Lopez Jaena pabalik sa dalan Burgos.
Paathag ni Liba nga amo lamang nga lugar ang maapektuhan sang rerouting.
Dugang pa sini nga nagduha-duha man ini nga isarado ang dalanon sa Burgos Public Cemetery bangod wala naman ini ginalubungan kag madamo sang mga madugay na nga nakalubong ang gina-exhume ukon ginasaylo na sa Handumanan Cemetery.
Apang paathag sang BTAO head nga indi man nila luyag nga hulton nga magginutok ang trapiko antes pa maghulag gani ginrequest sini ang pagpasarado sa dalanon sa Nobyembre 1 “All Saints’ Day” kag Nobyembre 2 “All Souls’ Day”.
Makita man nga matawhay na ang trapiko sa Nobyembre 2, mahimo naman nga ikanselar nalang sang mga ini ang road closure kag rerouting.
