Mauntat na lamang sa pagbiyahe ang public utility jeepney (PUJ) driver nga may routa Mandalagan-Libertad subong nga adlaw apisar nga sa 2023 pa maexpire ang franchise sang jeep nga ginaarkilahan sini bangud wala pa nakaabot ang iya official receipt / certificate of registration (ORCR).
Sa interview sang Bombo Radyo kay Vicente Grajo, 61-anyos, nagsugod ini sa pagbyahe sang 1980s kag nakapagraduate na sang bata sini sa college paagi sa pagdrive sang PUJ.
Suno diri, siya ang nagaarkila lamang sang salakyan kag registrado naman ini kag napa-emission na apang tubtob sa karun wala pa nakaabot ang ila ORCR.
Suno sa iya, apisar nga sa 2023 pa ma-expire ang prangkisa sang salakyan, mas pilion na lamang sini nga mag-untat sa pagbiyahe subong nga adlaw para sigurado sang sa madakpan ini sang Land Transportation Office.
Suno diri, wala naman ini sang may mahimo sa modernization program apang kun may mag-offer sa iya nga magdrive sang modernize jeepney, iya man ini batunon bangud ini na lamang ang iya nahibaluan nga palangabuhian.
Samtang, nagapanawagan ang presidente sang mga PUJ drivers nga may routa Mandalagan-Libertad nga pahanugutan lamang sila nga magbyahe samtang nagabiyahe man ang traditional jeepneys.
Suno kay Jonathan Mahilum, gintawgan ini ni UNDOC Secretary General Diego Malacad, presidente sang Sentrong Samahan ng mga Tsuper at Operators Negros (SSTONE) kag ni Mr. Chua, nga amu ang in-charge sa terminal nga sila ang mauntat anay sa pagbyahe bangud posible nga sila ang madakpan sang LTO nga wala sang prangkisa kag mamultahan pa.
Suno diri, diretso man sang tagsa ka mga drivers kun sila ang magabyahe subong nga adlaw apang mas ginpili sang kadam-an nga mag-untat na lamang agud indi mamultahan.
Isa man ini sa mga pamaagi suno sa iya agud mapalab-ot kay Mayor Alfredo Benitez ang ila sitwasyon.
Nagapanawagan ini nga kuntani sila ang pahanugutan lamang nga makabyahe kaupod ang mga modernize jeepneys agud may yara sila sang ibakal sang mga kinahanglanon sa ila mga panimalay.
