Ginahulat nalang sang regional office sang Department of Education Regional Office 6 ang department order nagikan sa central office sang Department of Education nga nagamando sang pagpatuman sang optional nga pagsuksok sang facemasks sang mga estudyante.
Sa interview sang Bombo Radyo Bacolod kay Hernani Escullar Jr., Public Information Officer sang DepEd Regional office 6, magaumpisa na 4,048 nga public schools sa rehiyon sang full face to face subong nga adlaw Nobyembre 2, apang magluwas nalang sa probinsya sang Antique nga nagpagwa sang executive order sa suspension sang mga klase sa sulod sang isa ka semana bangud sa epekto sang Bagyo Paeng sa nasambit nga probinsya.
Suno kay Escullar, bangud sa epekto sang Bagyo Paeng, mahimo ang Department of Education sang pamaagi agud nga indi man maapektuhan ang pagtuon sang mga estudyante.
Suno diri nagakadapat gid nga mapatuman ang pagbalik sang face to face classes kag kun may yara sang mga eskwelahan nga indi pa makapatuman sini, dapat magkuha sang clearance sa regional office sang Deped kag agud man mapahibalo ang central office sang ahensya nga ang nasambit nga eskwelahan ang indi pa mahimo makapatuman sang full face to face classes.
2051 man nga mga eskwelahan sa rehiyon ang nagpatuman na sang face to face humalin pa sang Oktubre 18.
Samtang may yara man sang 1,997 ka mga eskwelahan nga ginbuligan sang regional office agud nga makapatigayon na sang face to face classes.
Suno kay Escullar sa karun ipatuman sa gihapon ang existing order samtang wala pa sang bag-o nga Deped Order para sa pagsuksok sang facemasks sa sulod sang eskwelahan.
