Nagapati ang pila ka residente sa Estados Unidos nga dako na gid ang tsansa sang Toronto Raptors nga makuha ang kampeonato sa Game 5 sang NBA Finals sa Martes, oras sa Pilipinas.
Sa report ni Bombo international correspondent Noor Moraña nagikan sa Houston, Texas, aminado ini nga wala sila nanamian sa Golden State Warriors bangud masami sini nga ginalutos ang Houston Rockets.
Sa personal nga paglantaw ni Moraña, 75 tubtub 80 porsyento nga makuha sang Raptors ang championship sa masunod nga game, ilabi na nga magahampang sila sa ila mismo homecourt sa Scotiabank Arena sa Toronto, Ontario, Canada.
Mabaskog nga team ang GSW suno kay Moraña ilabi na pag-abot sa third quarter, apang bangud duha nila ka players ang wala nakahampang, nangin mabudlay para sa ila ang kadalag-an.
Sa tion nga indi pa gid makahampang si Kevin Durant sa Game 5 suno sa iya, labi na gid nga mabudlayan ang GSW.
Matalupangdan abi ang pagbaskog sa karon sang Raptors, ilabi na nga natun-an naman nila ang stratehiya sang Warriors sa court.
Suno kay Moraña, Raptors ang may pinakamadamo nga fans sa karon bangud bilog nga Canada ukon 36 million people ang nagatutok sa ila hampang.
