Ginhangkat sang Power Watch Negros ang pila ka miyembro sang Board of Directors sang Central Negros Electric Cooperative nga tuod-tuoron ang ila pahayag nga magaresign kun nagapresentar ang mga ini sang sala nga figure angot sa rate sang kuryente.
Ini ang kasunod sang public hearing sang Sangguniang Panlungsod sang Bacolod kahapon kun sa diin tatlo lang ka miyembro sang Board of Directors sang CENECO ang nagtambong.
Diri ginpahayag ni Father Ernie Larida nga ang rate sang kuryente nga ginakuha sang CENECO sa Palm Concepcion Power Corporation ang nagabili lamang sang P4.
Suno kay Sancho, ang P4 ang capital recovery rate lamang sang kuryente kag wala pa ang delivery rate kag generation charges, kag iban pa gani nakabutang sa bill nga P10.47 ang bili sang kuryente, luwas pa ang iban nga charges.
Suno kay Sancho, may form of deception of CENECO bangud P10.47 ang rate sang kuryente kag wala nakabutang sa website ang P4 nga bakal sang power distributor sa Palm Concepcion.
Ginpahayag ni Father Ernie Larida sa hearing nga magaresign ini sa BOD kun siya ang nagabinutig sa ginpresentar nga data.
Suno kay Sancho, dapat nga magresign ang BOD members bangud pagpatalang ang ginpresentar nila nga data sa konsumidor.
Aminado naman si Sancho nga wala na sang oras kahapon para mag-argue sa BOD members apang ila ini nga pagatun-an agud nga makafile sang nagakaigo nga reklamo kun kinahanglanon.
Suno sa convenor sang Power Watch, disgusted ini sa ginapresentar sang CENECO nga nagatuga sang tuman kadako nga galastuhan sang mga konsumidor nga nagadungan sa pagsaka sang iban nga mga balaklon.
