Isa ka modernized jeep sa ciudad sang Bacolod ang nagpatigayon nalang sang boundary basis system kasunod sa tuman nga pagsaka sang produktong petrolyo.
Sa interview sang Bombo Radyo kay Rembon Tobongbanua, konduktor sa modernized jeepney, wala sila nagpasaka sang plete bangud sa pagsuspende ni President Ferdinand Marcos Jr. sa fare increase rason nga sila ang nagatinguha agud nga makakuha sang madamo nga pasahero.
Suno kay Tobongbanua, ginhingyo sang ila operator nga sila ang maga rental basis lang anay kay bangud sa tuman ka mahal sang presyo sang diesel.
Ginapangabay sini nga magbalik na sa normal ang presyo sang gatong agud mabalik naman sa minimun ang ang ila nga sweldo.
Suno kay Tobongbanua, nagasugod sila byahe alas-6:00 sang aga tubtob alas-8:00 sang gab-i kun sa diin 300 tubtob 400 nalang ang ila nga mapauli nga income.
Pahayag sini nga gina-agwanta nalang nila ang sitwasyon subong kag ginakagangawa nga magapadayon ang pagsaka sang presyo sang produktong petrolyo.
Suno diri, kun maglab-ot na sa P130 ang presyo sang diesel, mapilitan nalang gid sila nga mag-untat sa pagbyahe bangud wala na sila sang may ma-income pa.
