ISRAEL – Ginpahayag sang isa ka overseas Filipino worker nga may ara sang mga Pilipino nga napatay kag mahimo gin-abduct sang mga Hamas sa Israel.
Sa interview sang Bombo Radyo Bacolod kay Bombo International Correspondent Jerome Gutierrez, derekta sa Israel, tubtob sa karun dugay-dugay gihapon nga mabatian ang tunog sang siren, nga nagapatimaan nga padayun ang pagpatigayon sang missile strike sang Palestinian militants.
Sila ang gilayon naman nga nagapanago sa mga bomb shelters sa tion nga mabatian ang sirens.
Suno kay Gutierrez, nag-umpisa ang pag-atake alas-8:30 sang Sabado sang gab-I oras sa Israel, ukon alas-3:30 kahapon sang hapon sa Pilipinas
Ang mga militante nga grupo ang nag-atake gikan sa kahawaan, kadagatan kag kadutaan kun sa diin gilayon man nila nakuha ang kontrol sa pito ka mga ciudad sa Israel nga malapit sa Gaza border.
Suno kay Gutierrez, ginpahayag sang amo sini nga nagatrabaho man sa military nga masobra 200 na ang reported nga nagkalamatay, apang nagapati ang mga ini nga mas madamo pa ang aktwal nga numero ilabi na nga madamo sang mga ginpang-abduct ang mga Hamas.
Gin-athag man sini nga may mga Pilipino man nga naulamid sa pag-atake kalakip na ang mga Agriculture students nga ginsulod sa ila puluy-an kag ginpangluthang, apang ini ang wala pa sang kumpirmasyon gikan sa embahada sang Pilipinas.
Suno kay Gutierrez, madamo man sang mga overseas Filipino workers (OFWs) nga nagatrabaho malapit sa Gaza borders bilang caregivers, partikular na sa Tel Aviv, kag iban sa kilala sini ang indi na nila macontact gani ginakahangaw-an ang posibilidad nga sila ang gin-abduct.
Nagpanaog naman sang paandam ang Philippine Embassy sa Israel sa mga OFW nga maghalong karun nga napaidalum na sa state of war ang pungsod.
Pasalig naman sang Israeli government nga ginatinguhaan nila nga mabawi ang pito ka mga ciudad nga yara sa kontrol sang mga Hamas.
Aminado naman ang mga ini nga kalabanan sa mga napatay ukon gin-abduct ang mga Israeli nationals apang ginapatihan nga 5 porsyento sa mga ini ang iban nga Nationalities kaangay sang mga Pilipino, Nepalese, Thailander kag iban pa.
Bilang sabat sa pag-atake, gin-atake man kag ginwasak sang Israel ang Palestinian tower sa Gaza strip.
Ginsarado naman ang mga dalan malapit sa kun diin nagaluntad ang mga engkwentro.
Suno kay Gutierrez, kaangay nga gingamit nga bentaha sang Hamas nga ang Israel ang indi preparado bangod sila ang yara pa sa religious holiday nga Yom Kippur ukon Day of Atonement.
May mga lugar man nga nagkalaguba matapos maigo sang missiles gikan sa Gaza nga wala na-intercept sang iron dome sang Israel.
Gina-imbestigaran paman sa karun sang Israeli government kun paano nakalusot ang mga Hamas militants sa gwardiyado nga border, kag napatigayon ang lipot nga pag-atake.
