Indi magnubo sa 36 ka mga persona lakip na ang isa ka bombero ang nadulaan sang kabuhi sa sunog nga nagluntad sa isa ka residential complex sa Tai Po, Hong Kong alas 2:51 sang hapon, Nobyembre 26.
279 naman ang sa karun indi pa macontact sang ila mga himata samtang 700 ka mga residente ang yara sa evacuation centers.
767 ka mga bombero, 400 ka mga police officers, 128 ka fire engines kag 57 ka mga ambulansya ang gindeploy agud magtapna sang kalayo.
Suno kay Bombo International News Correspondent Jeje Padilla Vergara direkta sa Hong Kong, walo ka mga nagatupad nga buildings nga ginabug-usan sang kapin 2,000 ka mga apartments ang nasunog.
Suno kay Vergara, ginalantaw nga bamboo scaffolding kag safety nets nga ginagamit para sa exterior repair, nga posible natup-an sang sigarilyo sang mga construction workers, ang gintunaan sang kalayo apang sa karun nagapadayon pa ang imbestigasyon sang mga otoridad.
Nasiplatan man sang mga otoridad ang polystyrene boards sa bintana sang mga apartments, nga ginakabig tuman ka inflammable ukon makapalapta sang kalayo.
Nagsugod ang kalayo sa Wang Fuk Court housing complex kag ginclassify sang fire department nga level five, ang pinakamataas nga level, alas 4:22 sang hapon.
Suno kay Vergara, madamo sang mga Filipino sa Tai Po kag kagab-i, may mga Pinoy nga natrap sa sulod sang building kaupod ang ila mga amo apang natigayon man nga narescue.
Suno sa iya, sa karun, wala sang reported nga Filipino nga nasamaran apang sila ang ginpanugyanan sang gobyerno sang Pilipinas nga maghalong kag mag-aligmat.
