Pabor si Punong Barangay Remus Abaring sang Barangay Bata, Bacolod City sa pagpalawig sang term of office sang Barangay kag Sangguniang Kabataan officials sa apat ka tuig, apang dapat hatagan man sang nagakadapat nga budget.
Sa interview sang Bombo Radyo Bacolod sa Punong Barangay, pabor para sa mga incumbent officials nga mapalawig sa apat ka tuig ang serbisyo sangsa karun nga 3-year term.
Samtang indi naman magapabor ang mga luyag kuntani nga magapapili sa pwesto.
Ini ang first term pa lamang ni Abaring, kag duha lamang ka tuig ang nangin pagserbisyo bangod sa nakaligad nga mga postponement sang eleksyon.
Sa karun, halos natuman naman sini ang mga proyekto nga ginpromisa sang siya ang nagapapili.
Apang isa sa problema sang Barangay amo ang dako nga pondo nga makasustain sa pagtinlo sang creek.
Pahanumdom ni Abaring nga ang Barangay Bata ang masami ginabaha kun madamol ang ulan, kag bangod sa segi-segi nga pagtinlo sang creek, apisar nagabaha madasig na lamang magsubside ang tubig.
Isa man sa ginaproyekto sini ang footwalk, agud may malabayan partikular na ang mga estudyante bangod malutak ang dalan kun mag-ulan.
Pangabay ni Abaring nga madayun man ukon indi ang term extension, dapat patas ang paghatag sang proyekto sa tagsa ka Barangay kag indi dapat ulamiron ang mga pumuluyo sa bangigay sa politika.
Gani indi na dapat tulukon kun kaalyado ukon kontra partido ang local officials, bangod ang proyekto ang para sa pumuluyo.
Kampante naman si Abaring nga nahimo sini ang obligasyon kag yara na sa mga pumuluyo kun siya ang suportahan nga makapabilin sa pwesto ukon luyag sang lain naman nga lider.
Apang kun madayun ang term extension, ini ang iya man pasalamatan bangod siya ang makapadayun pa sa serbisyo.Samtang, ginapanawagan ni Punong Barangay Noli Villarosa sang Barangay Tangub, Bacolod City ang patas nga paghatag sang proyekto sa mga Barangay.
Sa interview sang Bombo Radyo Bacolod kay Villarosa, maathag nga politika ang sa likod sang pagduso sang term-extension sang Barangay kag Sangguniang Kabataan officials sa apat ka tuig.
Suno diri, madamo sa mga Senador, Congressman, Governor kag Mayor ang nagapangita na sang paagi agud makuha ang buot sang mga Barangay officials bilang preparasyon sa 2028 Election.
Pabor man kay Villarosa kun ma-extend ang iya termino bangod ini ang last term na bilang Punong Barangay.
Apang isa sa pahanumdom sini nga dapat non-partisan ang mga Punong Barangay kag apisar may ginasuportahan nga kandidato sa pagka-alkalde, ini ang indi dapat ibalandra.
Suno diri, kun mapierdi ang ginasuportahan nga kandidato, ang pumuluyo ang mangin makaluluoy bangod kulang-kulang ang budget kag indi mahatagan prayoridad bangod mahimo kabigon nga kontra partido.
Sa karun ang Barangay Tangub ang may dalagkuan nga proyekto nga nagakinahanglan gid sang pondo kaangay sa drainage system kag road construction.
Dugang pa sini nga kun luyag magbulig, mas maayo nga isekreto na lamang kag indi ipadayaw.
Hingyo man sini nga mahatagan sang ligwa ang mga nagapapili nga mapresentar ang ila nga mga programa agud mas makapili ang mga pumuluyo.
Suno kay Villarosa, bilang performing Punong Barangay, indi dapat kontrahon ang mga pumuluyo.
Suno diri, ang Barangay ang una nga ginapalapitan sang mga pumuluyo, apang kun indi na masarangan ginapalab-ot nila ini sa mga konsehal, kongresista, bisi alkalde ukon alkalde.
Gani kun may-ara sang kontra politika, mangin mabudlay ang pagbulig sa mga pumuluyo.
