Ginpatuman ang pag-istrikto sa paggwa-sulod sa border sang siyudad sang Bacolod umpisa kahapon kadungan sang implementasyon sang general community quarantine sa ciudad.
Sa pag-tsekyar sang Bombo Radyo News Team sa boundary sang Bacolod kag Talisay City sa Barangay Bata, makit-an ang malaba nga pila sang mga salakyan subong man sang mga tawo.
Nahibaluan nga nagdeploy sang mga kapulisan nagikan sa Bacolod Police Station 2 agud magpatigayon sang checkpoint sa nasambit nga border sa pagpanguna ni P/Lt.Col. Levy Pangue kag sa bulig sang Department of Health (DOH) nga nagakuha sang temperatura sang nagasulod kag nagagwa sa border.
Naga-apelar ang kapulisan nga madugangan ang thermal scanner sa siyudad sang Bacolod bangud sa karon duha gid lamang ang ila ginagamit.
Nagpanugyan man ang Bacolod City Police Office nga magsunod sa mando sang gobyerno angot sa coronavirus disease 2019 (COVID-19) kag mag-obserbar sang social distancing.
Madumduman nga Domingo sang gab-i nagpaggwa si Mayor Evelio “Bing” Leonardia sang Executive Order nga gina-paidalum sa general community quarantine ang siyudad sang Bacolod.
