Aminado ang pinuno sang Bacolod Traffic Authority Office nga impractical kuntani ang pagsira sang bilog nga portion sang Dalan Lacson halin sa BS Aquino Drive padulong sa Social Security System bangud nakaandan nga sarang pa malabayan ang Lacson Street kun aga tubtub hapon.
Kahapon, ginsirado na ang portion sang Dalan Lacson gani naggutok ang dalagan sang trapiko sa Dalan San Juan kag Dalan Aguinaldo.
Suno diri, naggutok ang nasambit nga dalan bangud may mga nagapark sa higad sang dalan samtang may dalagko naman nga truck nga nagalabay sa Dalan San Juan.
Suno kay Liba, na-address na ang problema apang indi gid malikawan ang mga reklamo.
Aminado si Liba nga sang una, half lane lang sang Dalan Lacson ang may stage kag bukas ang pihak nga lane gani bukas ini sa aga tubtub alas-3:00 sa hapon.
Samtang sa karon, bilog gid nga 4-lanes ang gin-okupar sang stage para sa street party gani indi na ini mabuksan.
Bangud sini, gindivert ang trapiko sa 19th Street padulong sa Dalan San Agustin padulong sa BS Aquino Drive padulong sa Lacson Street.
Ang nakaandan sadto amo ang pagbutang sang stage sa tunga kag may tag-isa ka lane nga nabilin sa magtimbang nga dalan.
Ginrekomendar naman sang regional office nga isa nalang ka bahin sang dalan ang ibilin, apang gin-okupar sang isa ka telecommunication company ang bilog nga dalan para sa stage gani gin-reroute nalang ang mga salakyan.
Gin-athag naman ni Liba nga sarang makalabay sa Dalan Lacson ang mga residente nga nagaistar ukon nagatrabaho sa portion sang Lacson Street nga ginsirado.
Nagpanugyan si Liba sa mga magalagaw nga may salakyan nga likawan ang Downtown Area kag mga dalan nga ginsirado agud makalikaw sa magutok nga trapiko.
