Indi pabor ang public information officer sang Department of Education (DepEd) Division of Negros Occidental sa gina-propose sang isa ka DepEd official nga pagpalawig sang subong nga school year bangud sa COVID-19 pandemic.
Nahibaluan nga suno kay Education Undersecretary Diosdado San Antonio nga ginalantaw karon sang departamento nga I-extend ang school year nga natalana kuntani nga magatapos sa Hunyo 11 kag pagpalip-ot sang duha ka bulan nga summer break sa duha lamang ka semana.
Sa interview sang Bombo Radyo Bacolod kay Ian Arnod Arnaiz, ginpahayag sini nga nakasaad sa layi nga ang subong nga school year ang dapat may yara lamang sang minimum nga 200 school days.
Suno sa iya, indi solusyon ang pagpalawig sang school year kundi ang dapat nga tutukan sang DepEd amo ang pagpakaayo sang content sang mga module kag pag-reduce sang workload sang mga estudyante kag sang mga manunudlo.
Dugang pa sini nga ang pag-extend sang school year ang indi makasabat sang mga kabudlayan sang distance learning.
