Pito ka mga persona ang arestado sa ginpatigayon nga drug buybust operation sa isa ka drug den sa Purok Mahimulaton, Barangay Banago ciudad sang Bacolod alas-5:30 kaina sang kaagahon.
Ginkilala ang subject sa operasyon nga si Romeo Gain, 51-anyos kag residente sang amo nga lugar.
Natigayon man nga nadakpan ang mga kauapod sini nga sanday Romy Valenzuela, Ronnie Valenzuela kag Jupiter Valenzuela nga lunsay taga-Purok Mahimulaton, Barangay Banago kag Marvic dela Torre, Rico dela Torre kag Reymart dela Torre nga lunsay taga Sitio Balogo, Barangay Concepcion, Talisay City.
Sa interview sang Bombo Radyo Bacolod kay Philippine Drug Enforcement Agency (PDEA) Negros Occidental head Nicholas Gomez, ginpahayag sini nga madugay na nila nga gina-surveillance si Gain.
Suno kay Gomez, apisar nga wala sa listahan sang PDEA ang subject person, madamo naman sila sang nagakabaton nga reklamo halin sa mga pumuluyo nga ginahimo nga drug den kag bagsakan sang iligal nga druga ang balay sini.
Natigayon nga makuha sa ila possession kag kontrol ang 10 grams sang iligal nga druga kag nagabalor sang 68 mil pesos.
Sa karon, priso na ang mga suspetsado kag natalana nga pasakaan sang kaso sa pagbayolar sang Republic Act 9165 ukon Comprehensive Dangerous Drugs Act of 2002.
