Ginakalipay sang presidente sang Bacolod City Public School Teachers Federation ang plano sang Department of Education nga mag-hire sang 5,000 ka dugang nga non-teaching personnel sa masunod nga tuig agud nga magperform sang administrative tasks nga ginpasa sa public school teachers sa sulod sang malawig na nga tinuig.
Suno kay DepEd spokesperson Michael Poa, ini ang una nga kahigayunan nga magaemploy ang ahensya sang linibo ka administrative staff sa tinutuyo nga mareduce ang workload sang mga manunudlo.
Suno kay Poa, overworked ang mga manunudlo indi bangud sa teaching load kundi bangud sa administrative tasks.
Sa interview sang Bombo Radyo kay Mr. Richard Gelangre nga amo man ang principal sang Bacolod City National High School, dako ang mabuhin sa learning hours sang mga estudyante kun bayaan sang manunudllo ang iya classroom agud nga mag-ubra sang administrative load.
Suno kay Gelangre, expertise sang manunudlo ang pagpaalam sang mga estudyante gani amo ini ang dapat nila nga tutukan.
Kalabanan man nga eskwelahan ang ginakulang sang guidance counselor bangud isa ka guidance counselor ang kinahanglan para sa 500 ka estudyante kag amo man sini ang ratio sang school nurse.
Suno sa principal, maswerte lang ang Bacolod City National High School bangud ini ang pinakadako nga eskwelahan sa idalom sang Division of Bacolod City apang kalabanan nga eskwelahan ang ginakulang gid sang non-teaching staff.
