Welcome para sa pamunuan sang Bureau of Fisheries and Aquatic Resources (BFAR) regional office 6 ang paghatag sang gobyerno sang P100 million nga pondo para sa pagpasanyog sang salt production sa pungsod.
Sa interview sang Bombo Radyo Bacolod kay BFAR regional office 6 regional director Remia Aparri, apat ka probinsya sa Western Visayas ang nagahimo sang asin.
Ini ang ginalakipan sang probinsya sang Guimaras, Negros Occidental, Iloilo kag Antique kag may yara sang 118 ka salt processors.
Suno kay Aparri, nagakinahanglan ang kada Pinoy sang lima ka gramo sang asin kada adlaw.
Suno diri ang rehiyon ang may yara sang 113 hectares nga devoted area para sa salt production.
Suno sa regional director ang rehiyon ang nagaproduce sang 1214 metric tons sang asin.
Ginpahayag man ni Aparri nga agud mangin self sufficient ang rehiyon kinahanglan makaproduce sang 2536 metric tons sang asin kun sa diin may yara sang 1161 metric tons nga deficit sa supply.
Suno diri, apisar nga malapad ang lugar sang rehiyon nga may yara sang potensyal sa pagproduce sang asin, nagakakulang sagihapon bangud madamo na sang mga lugar sa rehiyon nga nagahimo sang asin ang ginconvert sa commercial purposes kaangay lamang sa probinsya kag syudad sang Iloilo nga ginalakipan sang Mandurriao, Jaro kag Leganes.
Suno kay Aparri sa tion nga madownload na ang pondo para sa pagpasanyog sang salt production, ginalantaw sini nga maghimo sang short term plan bangud ang asin ang mahimo lamang sa tion sang summer kag sa sulod sang anum ka bulan madamo na sang mapagwa nga production sang asin.
Ang P100 million nga budget ang gintalana nga ihatag sa Region 1, 6 kag 9 agud mapasanyog kag mapadamo ang produksyon sang asin agud nga mahagan-hagan ang pagimport sini.
Suno kay Aparri, malab-ot ang tinutuyo sang gobyerno nga mangin self reliant sa salt production kun magbuligay kag may yara sang engagement kasubong man sa collaboration sa mga private sector.
Ang asin ang multi-purpose commodity gani kinahanglan sang madamo nga supply.
