Padayon nga nakaalerto ang Philippine National Police (PNP) sa bug-os nga pungsod halin sa tion sang Pasko tubtob sa pagsulod sang Bag-ong Tuig 2026.
Ini agud masiguro ang kaluwasan kag seguridad sang publiko sa tunga sang mga selebrasyon.
Suno kay acting PNP Chief Police Lieutenant General Jose Melencio Nartatez Jr., nangin madinalag-on ang pagpatigayon sang siyam ka adlaw nga Simbang Gabi.
Suno diri, wala sang may na-record nga bisan ano nga insidente nga nakaapekto sa kalinong kag kaluwasan sang mga nagsimba.
Ginpasalamatan sini ang dedikasyon kag pagserbisyo sang mga kapulisan sa pagbantay sang seguridad sa mga simbahan kag sa husto nga pagpatuman sang mga layi.
Apang ginpahayag ni PLtGen. Nartatez nga mas mangin abala pa gid ang PNP sa tion sang Pasko kag Bag-ong Tuig kumpara sa Simbang Gabi.// Ini bangod sa ginalauman nga pagtaas sang mga insidente nga may kaangtanan sa paggamit sang mga papalupok kag iban pa nga klase sang firecrackers.
Bangud sini, ginmanduan ang tanan nga mga police station sa bug-os nga pungsod nga palig-onon ang ila kampanya batok sa iligal nga pagpanag-iya kag pagbaligya sang armas, subong man ang hugot nga pagdumili sa iligal nga mga palupok.
Kabahin man sang direktiba ang mas strikto nga pagmonitor sa online nga pagbaligya sang sini nga mga produkto agud mas mapunggan ang paglapta sang mga delikado nga balaklon.
