Wala ginadula sang Guihulngan City Police Station nga may kaangtanan sa iya trabaho ang motibo sa pagpatay kay Punong Barangay Romeo Alipan sa ila mismo nga balay sa Barangay Poblacion kaina sang kaagahon.
Si Alipan ang punong barangay sang Barangay Buenavista apang may balay ini sa Larena, Poblacion, Guihulngan sa diin siya nagtulog kagab-i.
Sa interview sang Bombo Radyo Bacolod sa case investigator nga si Police Executive Master Sergeant Jerome Delara, sa terasa nagtulog si Alipan apang kaupod man sini sa ila puluy-an ang iya misis kag mga anak.
Ginguba sang mga suspetsado ang gate sang balay sang punong barangay.
Sang nagsulod ang armado nga mga lalaki sa balay ni Alipan, ginhold sang iban sa ila ang misis kag anak antes ginkadtuan sa terasa ang punong barangay kag ginpaarakan sang luthang.
May iban man nga mga suspetsado nga nagpwesto sa kaiping nga mga balay agud indi sila makatawag sang pulis.
Suno kay Delara, ang barangay official lamang ang target sang mga suspetsado bangud wala man nila gintandog ang misis kag mga anak sini.
Suno sa imbestigador, mahimo nga nagatulog pa ang biktima sang ini ang gintiro.
Narekober sa crime scene ang apat ka empty shells sang M16 rifle.
