BACOLOD CITY – Gindul-ong na sa iya ulihi nga palahuwayan si Police Supt. Santiago Rapiz nga napatay sa buybust operation sa Dipolog City .
Nagbubo ang emosyon sa pagdul-ong sa iya sang iya asawa, walo ka kabataan, iya kauturan kag pamilya, iban pa nga himata, abyan kag mga kakilala sa Rose Lawns Memorial Park sa Brgy. Bata ciudad sang Bacolod kaina sang udto.
Sa misa nga ginpatigayon sa chapel mismo sa sulod sang sementeryo naghatag man sang mensahe ang iya pamilya antes ini ginlubong.
Kadungan sini, nagasuksok sang itom nga t-shirt ang iya pamilya nga may mga tinaga sang panawagan sang hustisya para sa kamatayon sang police colonel.
Antes man gingulo sa iya lulubngan, naghambal ang utod sini nga retirado man nga pulis nga si Leroy Rapiz kun sa diin ginpanindugan sini nga indi matuod ang mga elgasyon nga drug protector ang iya manghod.
Nagpasalamat man ini sa mga naybuglog sa ila kasubo kag nagapangayo ini nga pangamuyuan ang ini kadungan man sang hingyo sang divine intervention nga mahatagan hustisya ang kamatayon sang iya manghod nga gina-alegar “narco cop”.
Bangud nga wala ginhatagan sang military honor kaangay sang 21 gun salute si Supt. Santiago bangud napatay sa buybust nga siya mismo ang subjetc, ang duha ka motorcycle clubs kun sa diin presidente ang iya bayaw, amo ang naghatag sang tribute sa iya pinaagi sa pagpa-rebolusyon sang ila mga motorsiklo.
Nagpalupad man sang puti nga balloon kag white doves ang mga nagtambong sa lubong.
Madumduman nga napatay si Supt. Rapiz matapos gin-buybust sang Counter-Intelligence Task Force sang PNP sa AndreS Bonifacio College sa Dipolog City tinalikdan nga Noviembre 6.