Nagapadayon ang kooperasyon sang Talisay City Police Station kag La Carlota City Police Station para sa imbestigasyon sa pagpatay sa driver kag pahinante sang truck sang tinalikdan nga Hwebes.
Una nga nasapwan sa kilid sang kampo sa Hacienda Sta. Maria, Barangay Zone 15, Talisay City si Marjun Bandala, 36 anyos, pahinante sang truck samtang nasapwan man nga wala na sang kabuhi ang driver nga si Armando Sepocado sa sulod sang truck nga ginamaneho sini sa Barangay Haguimit sa La Carlota City, Negros Occidental.
Sa interview sang Bombo Radyo Bacolod kay Police Major Jun Ray Batadlan, Deputy Chief of Police sang Talisay City Police Station, una na nga nakumpirmar nga konektado ang insidente nga pagkasapo sang bangkay sa ciudad sang Talisay kag La Carlota.
Suno kay Batadlan, nag-abot na ang resulta sang postmortem examination sang nasapwan sa ciudad sang Talisay kun sa diin natukiban nga ang igo sang bala ang yara sa dughan kag abaga kag indi sa ulo kag dughan nga nauna nga ginpahayag sang police.
Dugang pa sini nga may ginasundan na ang mga kapulisan nga lead sa imbestigasyon sa pagpatay sa duha kag madamo sila sang anggulo nga ginaimbestigaran agud nga matumod ang motibo kag may kahimuan sang krimen.
Nagapanawagan man ang mga kapulisan sang La Carlota kag Talisay City sa kun sin-o man nga may yara sang impormasyon nga makabulig sa pagsolbar sang krimen indi na magpangduha duha sa pagpakig-angot sa mga ini kag ang ila identity ang taguon man para sa ila nga seguridad.
