Nakumpirmar nga personnel sang Bacolod Police Station 5 ang suspect sa pagpatay kay Kristine Joy Dignadice.
Madumduman nga si Kristine Joy ang gindeklarar nga missing matapos makita ang salakyan sini nga duguon sa sulod sang kampo sa Sitio So-ol, Brgy. Gargato, Hinigaran sang Oktubre 29.
Kaina sang aga, nagsurrender si Police Staff Sgt. Enrique Gonsaludo sa Police Regional Office – Negros Island Region kag gin-ako ang krimen.
Gin-updan man sini ang kapulisan sa pagrecover sang bangkay nga ginhaboy sini sa kakampuhan sa Central Ma-ao, Brgy Don Jorge Araneta, Bago City.
Sunod man nila nga ginpadulungan ang Bacolod-Talisay intersecion kun sa diin gina-alegar ginhimo sini ang pagpatay.
Sa interview sang Bombo Radyo Bacolod kay Police Captain Hazel Oropel, station commander sang Bacolod Police Station 5, samtang ginapatigayon ang imbestigasyon sa pagkadula ni Kristine Joy, 43 anyos, single mother kag residente sang Victorias City, nahibaluan man nila nga ini konektado kay Gonsaludo.
Si Gonsaludo ang mobile patroller sang Bacolod Police Station 5 nga assigned sa Tanod outpost sa Barangay Hall.
Ginpamangkot man nila si Gonsaludo angot sa pagkadula ni Kristine Joy, apang ini ang wala mag-ako.
Wala man ginkumpirmar ni Oropel kun ano ang relasyon sang duha, apang suno diri pamilyado si Gonsaludo.
Antes ma-assign sa Bacolod Police Station 5, ang suspect ang nakaserbisyo man sa Victorias City, Pulupandan kag Talisay City.
Suno kay Oropel, nahibaluan na lamang nila nga nagsurrender na si Gonsaludo sang sila ang ginpatawag na.
Ginrelieve naman ini sa serbisyo agud atubangon ang kaso.
Pasakaan sang kaso nga murder ang suspect paagi sa inquest proceedings.
