BACOLOD CITY — Nagpaguwa sang resolusyon ang Regional Advisory Council for Police Transformation and Development sang Police Regional Office (PRO) 18 nga nagakondenar sa pag ambush sang New People’s Army sa mga katapo sang Guihulngan City Police Station kag subong man naga hingyo sang suporta para sa lokal nga kapulisan.
Suno kay PRO-18 public information officer Senior Inspector Armelyn Varga, ang nasambit nga resolusyon ang nagamando sa mga police stations sa isla sang Negros kag tanan nga local governmenta units (LGU) nga magbutang sang mga tarpaulins nga nagakondenar sa nasambit nga ambush kag magpakita sang mga terrostic acts sang New People’s Army (NPA).
Diri man ginahingyo ang paghatag sang suporta sa pamilya sang nagkalamatay kag mismo sa lokal nga kapulisan.
Hatagan man sang kopya sang nasambit nga resolusyon ang pamilya sang nagkalamatay nga katapo sang Guihulngan police nga sanday SPO2 Necasio Tabilon; SPO2 Teovic Agosto; SPO1 Jesael Ancheta; PO2 Alvin Paul Bulandres; PO2 Alfredo Dunque kag ila hepe nga si Police Supt. Arnel Arpon.
Madumduman nga gin-ako na sang NPA sa idalom sang Leonardo Panaligan Command nga sila ang responsable sa ambush sang Hulyo 21.
Sa karun yara pa sa half-mast ang mga hayahay sa mga police stations sa NIR kag ibalik ini sa normal kun malubong na ang tanan nga nagkalamatay.
Nahibaluan nga nalubong na ang lima sa anom ka mga pulis samtang subong naman nga adlaw, Sabado, igalubong si Police Supt. Arpon sa banwa sang Hinobaan.
