BACOLOD CITY — Ginlubong na ang tatlo sa anom ka mga pulis nga napatay sa ambush sa Brgy. Magsaysay ciudad sang Guihulngan tinalikdan nga Hulyo 21.
Ginlubong sang Domingo sang aga si SPO2 Necasio Tabilon kag ala-1:00 sang hapon ginlubong man si PO2 Alvin Paul Bulandres sa ciudad sang Guihulngan samtang sa banwa sang Jimalalud naman gin lubong si SPO1 Jesael Ancheta.
Subong nga Lunes, igalubong naman si PO2 Alfredo Dunque sa Guihulngan kag sa La Libertad naman si SPO2 Toevic Agosto.
Ginkumpirmar man ni Supt. Carlos Lacuesta Jr., acting chief of police sang Guihulngan City Police Station, nga sa Agosto 5 igadul-ong sa ulihi nga palahuwayan ang napatay nga hepe nga si Police Supt. Arnel Arpon.
Samtang yara naman sa maayo nga kahimtangan ang napilasan sa ambush nga sanday SPO4 Jerome Delara; PO3 Jordan Balderas kag PO2 Joery Maribao apang wala pa nakaguwa ang mga ini sa Siliman University Medical Center.
Apisar sang mga report nga may yara sang sightings sang mga armado nga kalalakin-an sa ibabaw ginapasiguro ni Lacuesta nga wala sang dapat kakulbaan bangud nagabantay sa karun ang 79th IB sang Philippine Army kag Special Action Force (SAF) sang PNP.
Apang aminado ini nga indi gid madula sa mga pumuluyo nga kulbaan bangud subong temprano pa nagapanira sang ila kabalayan ang mga ini kag wala na sang naga pa-gab-i gid sa dalan kasunod sang ambush.
