Balantayan suno sa political analyst ang mangin pagbalos ni former Senator Leila de Lima sa mga responsible sa pagpapriso sa iya.
Ini kasunod sa nangin statement sang anay Senador matapos mapagwa sa prisuhan nga magabayad si former President Rodrigo Duterte sa mga kasal-anan sini sa mga pumuluyo.
Kalakip na ang linibo nga nagkalamatay sa war on drugs, kag mga inosente nga ginpapriso kaangay sa iya.
Sa interview sang Bombo Radyo Bacolod kay Atty Jomax Ortiz, ginalantaw na sini nga si De Lima ang magafacilitate agud mapatuman sang International Criminal Court (ICC) ang pagserbe sang Warrant of Arrest batok sa anay Presidente.
Dugang pa sini nga hikutaron man ni De Lima nga mapadayun ang hearing sang International Human Rights may kaangtanan sa masobra 15,000 nga gina-alegar biktima sang extrajudicial killings, apisar nga 6,000 lamang ang narecord sang Philippine National Police.
Paathag ni Ortiz nga nabasura ang mga kaso nga ginpasaka sa anay Senadora bangod wala na nagpatigayon sang presintasyon sang ebidensya bangod ini ang indi man gihapon makasustiner sang conviction.
Kag gindugangan pa sang pagrecant sang mga witnesses ukon pagwithdraw sang ila mga testimoniya.
Paathag ni Ortiz nga may-ara sang layi nga kun ang persona ang nadetain bangod a pato-pato lamang nga kaso, sila ang sarang makabatun sang kompensasyon sa gobyerno apang ini ang wala nagalapaw sa P10,000.
Ginalantaw sang abogado nga indi na maglagas pa sang P10,000 si De Lima, apang segurado ini nga magahimo sang tikang ang anay Senador agud malagas ang mga responsable sa pagpapriso sa iya.
Suno kay Ortiz, si De Lima ang nagapabilin nga tagpamaba sang Liberal Party, kag ginapaabot na sini nga may matabo nga coalition sa Partido Federal ng Pilipinas ni President Ferdinand ‘Bongbong’ Marcos ilabi na nga sila ang may common enemy.
