Ini na bag-o ang nagakatabo nga pagtipyok sang mga miyembro sang Partido Demokratiko Pilipino (PDP) ni former President Rodrigo Duterte sa Partido Federal ng Pilipinas (PFP) ni President Ferdinand “Bongbong” Marcos Jr., kag ginalantaw nga indi ang magadamo pa antes ang filing sang Certificate of Candidacy (COC).
Ini kasunod sang mass oathtaking sa PFP nga ginpatigayon sa Iloilo City kun sa diin ginatos sa mga ini ang gikan sa PDP.
Sa interview sang Bombo Radyo Bacolod kay Political Analyst Atty. Jomax Ortiz, sa politika wala sang permanente nga abyan kundi permanente lamang nga interes.
Paathag sang abogado nga bangod may apat pa ka tuig nga nabilin sa termino ni Presidente Marcos ini man ang magahatag sang apat pa ka annual budget.
Bangod ang budget sang lokal nga gobyerno ang nakasandig sa National Budget, yara ang kahangawa nga indi mahatagan sang nagakaigo nga budget ang indi kaalyado sang administrasyon, samtang mahatagan naman sang pabor ang kaalyado.
Bangod nga nagahilapit ang 2025 midterm elections, kag kinahanglan sang mga magakandidato sang mabaskog nga suporta, ginalauman na nga madamo pa sang magatipyok antes ang Oktobre 1 tubtob 8 nga schedule sang COC filing.
Dugang pa sini nga bisan ang mga independent candidate ang ginapaabot man sini nga magasulod sa PFP.
Nagapati si Ortiz nga gikan sa Iloilo, ini ang magalaton-laton naman sa iban nga mga probinsya partikular na sa Negros Occidental.
Paathag sang political analyst nga ang pagsulod sa PFP ang temporaryo lamang nga remedy sang mga magapapili para sa 2025 Elections bangod sa 2028 National Election, sa pagtakop sang termino ni Presidente Marcos, sila ang mahimo magsaylo man sa partido sang mas mabaskog nga kandidato.
