Nagapati ang political analyst sa posibilidad nga intrahan ni President Ferdinand “Bongbong” Marcos Jr. agud mapadasig ang resolusyon sang impeachment complaint batok kay Vice President Sara Duterte subong nga 19th Congress.
Sa interview sang Bombo Radyo Bacolod kay Atty Jomax Ortiz, kamatuoran na sa pamulitika sa Pilipinas nga ginapapahigad ang moralidad kabaylo sang pabor ukon convenience.
Suno diri, normal na nga lain ang kahulugan sang ginabuy-an nga pahayag sang isa ka politiko.
Kaangay lamang kay President Ferdinand “Bongbong” Marcos Jr. nga nagapahayag nga indi sini luyag nga dayunon ang impeachment bangod masakripisyo sini ang oras nga kuntani magamit sa pagtalakay sang mga importante nga problema sa pungsod.
Ang nasambitan man nga pahayag ang ginsuportahan sang Iglesia Ni Cristo sa ginpatigayon nga National Rally for Peace.
Apang sa karun kaangay nga nagbaylo ang presidente bangod gintugyanan sini si Ilocos Norte 1st District Representative Sandro Marcos nga himuon ang trabaho kag amo ang una nga nagpirma sa ika-apat nga impeachment complaint.
Suno diri, naluto na ngadaan ang ika-apat nga impeachment, kag imbes nga gamiton ang 25 grounds sang una nga complaint sila ang nagfocus na lamang sa duha ka grounds ang betrayal of public trust kag corruption kun sa diin sila ang may mas dako nga tyansa.
Ini paagi man agud mapadasig ang proseso sang impeachment trial kag matapos antes pa ang pagtakop sang 19th Congress.
Suno kay Ortiz, bangod si Senate President Francis “Chiz” Escudero, ang ginbutang sa pwesto ni Presidente Marcos, ini ang may utang kabalaslan kag wala sang mahimo kun maghambal ang Presidente nga dayunon ang impeachment trial kag padasigon.
Sa paglantaw sini, masarangan nga matigayon ang impeachment sa sulod lamang sang isa ka bulan.
Pahanumdom sini nga sang wala pa na-aprubahan ang 2025 General Appropriations Act halos wala sang aktibo nga nagaduso sang impeachment, apang sang yara na ang pondo sila ang gilayon nga nagpirma.
Suno diri, mahimo padalion ang impeachment process bangod dako pa ang kaseguraduhan nga makakuha sang 16 votes sa mga Senador.
Ang pamangkot sa karun kun matapos ang impeachment trial antes magtakop ang 19th Congress.
Apang ginakasubo sini nga hayag na nga number games ang politika sa Pilipinas bangod kun diin ang loyalty nga partido, didto ang mga ini magasuporta kag wala na ginabasihan ang merits.
