Ginpahayag ni Senador Panfilo “Ping” Lacson nga dapat nagpatigayon ang Commission on Audit (COA) sang mas madalom nga pag-usisa sa paggamit sang aliases, kalakip ang inspection sa vault nga ginabutangan sang classified information, sa pag-audit sini sa paggamit sang confidential funds.
Suno kay Lacson, nakasaysay sa Joint Memorandum Circular no. 2015-01 ang mga pamaagi para sa pag-inspect sa vault kun diin nakabutang ang classified information, kalakip ang pagberipika sa matuod nga identity sang mga tao nga nga naggamit sang mga alyas sa mga dokumento.
Suno diri, dapat matumod sang COA kun sin-o ang mga matuod nga personalidad nga yara sa likod sang mga alyas nga nagtuhaw sa acknowledgment receipts, kaangay nanday “Mary Grace Piattos,” “Patty Ting” kag “Andy Lim.”
Dugang pa sini, mahimo maggamit sang mga aliases sa mga dokumento nga may kaangtanan sa confidential operations, apang dapat may yara gihapon sang pamaagi agud matumod kag ma-verify sang COA ang mga indibidwal nga nakapirma sa acknowledgment receipts.
Ginkwestyon man sang senador kun paano gin-verify sang COA ang confidential fund transactions kun wala sini aktuwal nga na-inspect ang vault kag nagsalig lamang sa paper audit.
Kadungan sini, ginmensyonar ni Lacson ang COA Circular No. 2020-005 nga nagaproseso para sa fraud audit investigation.
Suno sa senador, mahimo magpatigayon sang fraud audit investigation ang COA kun may impormasyon nga may natabo nga fraud.
Gani, dapat kwestyunon ang COA kun ngaa wala nagpatigayon sang fraud audit investigation sa pihak sang mga impormasyon nga naggwa sa pag-audit sang confidential funds.
