Nagapanawagan si Pope Leo XIV sa Venezuela nga magpabilin nga independent nation kag nagpahayag nga ginasundan sini ang mga developments matapos nga gin-aresto sang Estados Unidos si President Nicolas Maduro.
Suno kay Pope Leo, ang pinakauna nga American pope, nagapanawagan man ini sang pagrespeto sa tawhanon nga kinamatarong kag rule of Law nga nakasaad sa constitution sang Venezuela.
Sang Sabado, ginpahayag ni President Donald Trump nga ang Estados Unidos na ang maga-control sang oil-rich Venezuela matapos ang ginmando nga pagdakop kay Maduro nga sa karun napriso sa New York detention center kag nagahulat sa drug charges.
Ang Santo Papa nga nagpakamalaot sang right-wing policies ni Trump ang nag-engganyo sa presidente sang Estados Unidos sang Disyembre nga indi pagsipaon si Maduro gamit ang military force.
Nahibaluan nga una na ginpahayag ni US President Donald Trump nga ang Estados Unidos ang magadumala sa Venezuela matapos ang ginapatihan sini nga madinalag-on nga overnight military operation kag pagdakop kay Venezuela President Nicolás Maduro kag sang iya asawa nga si Cilia Flores sa Caracas.
Suno kay Trump ang mga armado nga pwersa sang Estados Unidos ang naghimo sang isa ka coordinated nga pagpang-atake sa kahanginan, duta, kag kadagatan sa kapital sang Venezuela sang Sabado sang gab-i.
Dugang pa ni Trump nga pagadumalahan sang Estados Unidos ang pungsod tubtob sa tion nga makahimo sang isa ka safe, nagakaigo, kag patas nga transition.
Ang pwersa sang Estados Unidos ang magapabilin sa Venezuela tubtob may matukod nga isa ka bag-o nga gobyerno.
