Welcome development para sa Power Watch Negros ang pag-aprubar sang Senador sa House Bill 9805 bangod sila ang kabahin sa mga nagaduso nga mapadasig ang paggrant sang prangkisa sa Negros Electric and Power Corporation (NEPC).
Sa interview sang Bombo Radyo Bacolod kay Wennie Sancho, convenor sa Power Watch Negros, ang NEPC ang magatransform sang infrastructure sang Central Negros Electric Cooperative (CENECO), agud mahatag ang masaligan kag bastante nga supply sang kuryente.
Pinaagi sini, indi na magkabalaka ang mga member-consumer sang asod-asod kag malawig nga brown out.
Panawagan ni Sancho sa mga konsumedor kag mga opisyales sang gobyerno nga hatagan sang tyansa ang NEPC nga mapamatud-an ang ila serbisyo kag matuman ang ila 5-year development plan.
Suno diri, ang NEPC ang magabutang sang mga bag-o nga makenarya kag mga state of the art technologies agud ma-islan na ang nagapalay-palay nga mga equipments sang CENECO.
Nagapati ini nga wala na sang legal impediment ukon pagpamalabag sa hagna gani ini ang madali na lamang mangin layi, magluwas lamang kun i-veto ni President Ferdinand “Bongbong” Marcos Jr.
Hugot nga nagapati si Sancho nga nakita man sang mga opisyal sa gobyerno ang madasig nga pagsanyog sang ekonomiya sa Bacolod City.
Pahanumdom sini nga ang pagsanyog sang ekonomiya ang nagakinahanglan man sang mas mataas kag tayuyon nga power supply.
Apisar nga wala pa naga-operate, may mga personnel naman ang NEPC nga gindeploy agud magbulig sa CENECO sa pagresponder sa mga issue.
