Suportado sang Power Watch Negros ang proposal ni Mayor Alfredo Benitez nga ireduce ang power rate sa P12 per kilowatt hour bangud kun ini ang madayon, mga konsumidor man ang magabenepisyo sini.
Apang aminado si Power Watch Negros convenor Wennie Sancho nga nagapakilala lang ini kun sanday sin-o ang mga nagapungko sa Board of Directors sang Central Negros Occidental Electric Cooperative bangud wala nila nakita ang disparity sang rate sang nagpirma sila sa kontrata.
Suno kay Sancho, gross negligence ini sa bahin sang Board bangud wala sila nag-usisa angot diri.
Suno diri, kun makit-an nga may error ang Board sang CENECO sa power rate, ini ang igarefund sa mga konsumidor kag sila ang dapat nga mabayad sini bangud sila ang may negligence.
Suno kay Sancho, natabo ang disparity sa Palm Concepcion Power Corporation bangud ginpadalian ang pagbakal sang power kag wala naglabay sa competitive selection process.
Amo ini ang rason suno kay Sancho nga ginaduso sang Power Watch nga ideklarar ang CENECO bilang ailing power cooperative nga dapat itakeover sang National Electrification Administration.
Suno kay Sancho, kaangay nga sinking ship na ang CENECO apang ginatabon-tabunan ini sang mga miyembro sang Board of Directors kag mga konsumidor ang nagaagwanta.
Sa karon, ginabaligya sang CENECO sa WESM ang sobra nga supply nagikan sa Palm Concepcion Power Corporation gani ini ang nagakapierdihan.
Ginakalipay man sini nga ginpamatian ang ila reklamo batok sa CENECO.
