Ginatinguhaan sang Bacolod City Government nga temprano pa nga mapreparahan ang 2024 Masskara Festival.
Sa interview sang Bombo Radyo Bacolod kay Councilor Jude Thaddeus “Thaddy” Sayson, chairperson sa Committee on Finance sa Sangguniang Panlungsod, Agosto na sang nakaligad nga tuig sang nahatagan sang approval ang Bacolod Yuhum Foundation gani duha lang ka bulan ang ila preparasyon kag pagpangita sang sponsors.
Aminado ini nga mabudlay kun gahol na sa tiyempo bangod sa kaangay nga mga sponsorship sa masami nga Board of Directors sang mga kompanya gid ang nagadesisyon.
Ginatinguhaan nila nga ma-aprubahan na subong nga Marso ang paghatag sang authority sa Bacolod Yuhum Foundation nga makadumala sang 2024 Masskara Festival.
Apang padayun pa nga ginahulat sang Bacolod City Government nga masumiter sang Bacolod Yuhum Foundation ang financial report sang 2023 Masskara Festival, nga kabahin sa requirement nga kinahanglan antes liwat nga ma-award sa ila ang management sang 2024 Masskara Festival.
Sa pihak nga bahin, kun ma-aprubahan subong nga Marso mahatagan sang pito ka bulan ang Bacolod Yuhum Foundation agud mapreparahan ang kapiyestahan kag makapangita sang nagakaigo nga sponsors.
Dugang pa ni Sayson, ini ang makabulig man agud nga indi na liwat nga manabunan si Bacolod City Mayor Alfredo “Albee” Benitez.
Nahibaluan nga sang 2022 kag 2023 Masskara Festival, mas manubo ang natipon nga income sang ciudad kun ipaanggid sa expenses, sa idalum sang pagdumala sang Bacolod Yuhum Foundation, gani dako ang gintabon sang alkalde.
Pahayag ni Sayson, indi nila luyag nga apisar nga City of Smile ang Bacolod City, maggakurisong naman ang alkalde.
Sa pihak nga bahin, ginalantaw naman nga mahimo buhinan ang festival sites, kag pilion na lamang ang mga lugar nga nakaganar sang mas maayo.
Isa man sa ginatun-an amo ang temprano nga bookings sang flights para sa mga celebrities kag iban pa nga bisita nga gina-imbetar sa ciudad bangod isa sa tuman ka dako nga expenses sa nakaligad nga Masskara Festival amo ang travel kag talent fees.
