Aminado si President Ferdinand ‘Bongbong’ Marcos Jr. nga nabudlayan ini sa pagpili sang masunod nga mangin tiglikom sa Department of Education (DepEd).
Pahayag sini nga madamo ini sang kinahanglan ikonsiderar sa ibutang sa pwesto bangod may-ara sang mga nagapanawagan nga dapat educator ang masunod nga Education Secretary.
May nagapanawagan man nga dapat Administrator ang ibutang, kag may-ara man nga nagapanugyan sang Historical Professor.
Paathag sang Presidente nga tanan ini ang valid ang concerns kag madamo man ini sang nakita nga kwalipikado.
Apang nabudlayan ini gihapon sa pagpili, ilabi na nga nakita sini nga ang dapat nga mangin Education Secretary amo ang may ihibalo sa sektor kag sarang mabuligan ang mga estudyante kag manunudlo agud maaddress ang panginahanglanon sa educational standards.
Aminado ang Presidente nga tuman ka damo sang trabaho sang DepEd Secretary bangod ini ang dapat nakahibalo sa management, nakahangop sang bureaucracy kag may ihibalo sa pagmanage sang budget, gani ginapasalamatan gid sini ang nangin pagtinguha ni Vice President Sara Duterte.
Madumduman nga nagrender sang resignation sa cabinet position ang Bise Presidente sang Hunyo 19 kalakip na sa posisyon sini bilang Vice Chairman sang National Task Force to End Local Communist Armed Conflict (NTF-ELCAC).
Apang naghatag man ini sang isa ka bulan, agud makapili sang panibag-o nga tiglikom ang administrasyon, kag magatake-effect ang iya resignation sa Hulyo 19.
