Wala sang iban nga ginmando si President Ferdinand ”Bongbong” Marcos Jr. kundi nga padayunon sang Independent Commission for Infrastructure (ICI) ang ila trabaho apisar duha ka mga opisyal sini ang nag-resign sa ila pwesto, suno sa Malacañang.
Sa press briefing, ginpangayuan sang komento si Palace Press Officer Undersecretary Claire Castro sa statement ni ICI special adviser Rodolfo Azurin Jr. nga nagaplano sila nga magpadala sang formal letter sa Office of the President para sa clarification kag guidance sa kun ano ang matabo sa commission.
Ginpahayag ni Castro nga luyag sang Presidente nga may layi nga magahimo sang isa ka independent commission, nga amo ang maga-imbestigar sa infrastructure projects.
Una na nga ginpanawagan sang Presidente sa Kongreso nga i-prioritize ang pagpasar sang ginaduso nga Independent People’s Commission (IPC) Act.
Ginpahayag ni Senate President Vicente “Tito” Sotto III nga mahimo ma-aprubahan sang Senado ang hagna sa Pebrero.
