Nagpasalig si President Ferdinand Marcos Jr. nga indi magdangat sa gyera ang pamaagi sa pag-address sang issue sa West Philippine Sea.
Suno kay Marcos, pagaatubangon sang pungsod ang issues may kaangtanan sa ginaagawan nga rehiyon sa malinong nga pamaagi.
Suno diri, indi magsugod sang gyera ang Pilipinas kag ang handum sang pungsod amu nga makahatag sang malinong kag bugana nga kabuhi sa tagsa ka Filipino kag ini ang prinsipyo nga nagagiya sa mga opisyales.
Indi man sini luyag nga magpili sang bahin sa iya gintawag nga “great power competition” bangud wala sang gobyerno nga matuod-tuod nga nagaserbi sa mga pumuluyo ang magaganyat sang pagpamahog sa kabuhi kag palangabuhian.
Ini ang ginpahayag sang Presidente sa isa Talk to Troops event sa headquarters sang Western Command sa Camp General Artemio Ricarte sa Puerto Princesa City, Palawan kun sa diin iya ginhatagan sang honor ang mga suldado nga nakigbahin sa resupply mission sang tinalikdan nga Lunes.
