Aminado ang presidente sang Bacolod City Public School Teachers Federation nga may positibo nga resulta ang reshuffling ukon pagbalasa sa mga principal.
Ini ang kasunod sang kumpirmasyon ni OIC schools division superitendent Reynaldo Gico nga balasahon na ang mga principal sang public elementary schools nga nakatinir sang duha tubtub tatlo ka tuig sa pwesto.
Sa interview sang Bombo Radyo kay Mr. Richard Gelangre nga amo man ang principal sang Bacolod City National High School, madala sang performing principal sa iban nga eskwelahan ang maayo nga programa kag proyekto kag mabag-o man sini ang iya nga leadership style kun may negatibo nga reklamo sa iya ginhalinan.
Aminado si Gelangre nga natural lang ang kritisismo sa isa ka empleyado ukon opisyal sang gobyerno bangud indi malikawan nga may yara sang nasawayan kag indi palareho ang tanan apang kun madamo na, mahimo nga may yara na sang dapat bag-uhon sang natungdan.
Sa pihak sini, nagalaom si Gelangre nga rationale ang tanan nga magbaton sang pagbag-o kag maghatag sang tsansa sa nakasala nga magbag-o.
Suno kay Gelangre, normal lang ang pagbalasa sang mga principal ilabi na sa elementary schools.
Suno sa principal, public office is a public trust gani kinahanglan nga panumdumon ang kaayuhon sang eskwelahan kag sang mga estudyante sa baylo nga padalman ang differences sang kada isa.
Nagpanawagan man ini sa mga manunudlo nga mangita sang paagi nga makarelax sang paminsaron bangud indi madali-dali ang gusto nga mabag-o apang iexercise man ang kinamatarong nga magreklamo kun agrabyado bangud magasabat lang ang natungdan kun sila ang nakasala.
