Nagapanawagan ang presidente sang Negros Occidental Guidance and Counseling Organization sa Department of Education nga mag-hire gid sang registered guidance counselor (RGC) para sa mga public schools kag indi lang lunsay guidance associate (GA).
Sang damlag lang, ginlunsyar ni DepEd Secretary Sonny Angara ang nationwide recruitment sang 10,000 School Counselor Associate 1 positions agud nga masolusyunan ang kakulang sang learner mental health services.
Ini ang kabahin sang implementasyon sang Republic Act No. 12080 ukon Basic Education Mental Health and Well-being Promotion Act.
Ang mga Schools Division Offices nga nakabaton sang Notice of Organization, Staffing, and Classification Action (NOSCA) ang ginmanduan nga suguran na gilayon ang pagfill-in sang entry-level positions.
Agud nga mapadasig ang recruitment nationwide, ginmanduan sang DepEd ang tanan nga mga SDOs nga magconduct sang kabug-usan nga recruitment process paagi sa digital recruitment platform nga Agile Gateway for Appointments and Placements (AGAP) System.
Sa interview sang Bombo Radyo kay Dr. Madeline Sotomil, ginakilala nila ang bulig kag supportive roles sang mga guidance associate apang indi sila replacement sa mga RGC bangud indi sila makapatigayon sang guidance counseling.
Suno kay Sotomil, indi lisensyado ukon registered ang GA gani nagaserbe lamang sila nga para-professional members sang mental health team.
Sa idalom sang Republic Act No. 9258 ukon Guidance and Counseling Act of 2004, ang GA ang pwede makainterview, makahimo sang referrals, maka-engage sa planning kag iban pa, apang indi sila makapatigayon sang counseling nga amo ang ginakinahanglan sang mga pamatan-on sa subong nga panahon.
Kun lunsay GA ang i-hire sang DepEd suno kay Sotomil, indi matuman ang katuyuan sang programa nga paghatag sang counseling sa mga estudyante.
May yara man sang Code of Ethics nga ginasunod ang mga RGC nga wala sa GA.
Magluwas sa pag-hire sang RGC, ginaduso man ni Sotomil nga hatagan sang nagakaigo nga financial support ang guidance counselor para sa care services and programs sa eskwelahan.
