Nagapasalamat ang presidente sang United Sugar Producers Federation (UNIFED) matapos nga nagsaka man ang mill gate price sang kalamay kadungan sang nagapadayon nga milling season sang tubo.
Sa interview sang Bombo Radyo Bacolod kay Manuel Lamata, nagapasalamat ini bangud nakaginansya man sila kag wala na sila ginabarat sang mga traders.
Suno kay Lamata, P60 tubtob P65.00 kada kilo ang baklanay sang ila kalamay.
Aminado man ini nga nagahana na man nga maganubo ang pagbakal sang mga traders sang kalamay.
Bangud sini, ginapangamuyo man nila nga indi man magtama ka nubo ang pagbakal sang ila produkto agud indi man sila mapierde bangud tuman man kataas ang production cost sang tubo.
Ginpahayag man sini nga ang P85.00 kada kilo sang kalamay ang justifiable naman bangud indi man makapangita sang barato kasunod sang pagmahal sang tanan nga mga balaklon kadungan man sang krisis sa bug-os nga kalibutan.
Ginalauman naman nga maganubo ang presyo sang kalamay bangud magadamo naman ang supply sa merkado.
Samtang, suportado naman sang UNIFED ang pagpabaligya sang Sugar Regulatory Administration (SRA) Bacolod City Office sang P70 kada kilo sang refined sugar.
Suno kay Lamata, ang programa nga pagbaligya sang P70 per kilo ang kabahin sang plano sang presidente bilang pinuno sa Department of Agriculture.
Ginpahayag man sini nga ang mga traders ang naghatag man sang 10 percent nagikan sang stocks nila sang kalamay.
Nagamat-amat gwa sa merkado ang mga locally produced nga kalamay gani dako ang tsansa nga maganubo na ang presyo sini kag indi na mapunggan sang mga trader.
