Nagpaandam ang Presidential Communications Office (PCO) batok sa paglapnag sang sala nga impormasyon sa sitwasyon subong sang enerhiya sa pungsod.
Sa pahayag ni PCO Secretary Dave Gomez, ang sin-o man nga hungod nga nagahimo kag nagapalapta sang fake news online ang manabat sa idalom sang layi.
Ginpahanumdom ni Secretary Gomez nga ang pagpalapta sang “fake news” ang may penalidad nga tubtob anum ka bulan nga pagkapreso sa idalum sang Revised Penal Code.
Kun himuon ini online, doble ang penalidad sa idalum sang Cybercrime Prevention Act.
Suno kay Gomez, ang disinformation ang nagaguba sang pagsalig sang publiko, kag nagapaluya sang ekonomiya ilabi na sa tunga sang krisis sa enerhiya.
Suno sa iya, ang anuman nga pangpatalang sa publiko angot sa seguridad sang enerhiya, suplay, kag presyo ang makabig nga isa ka daku nga paglapas sa layi.
Ginpahayag sang tiglikom nga magpakig-angot ang PCO sa Department of Justice (DOJ) agud magpasaka sang kaso batok sa mga napamatud-an nga nagapalapta sang fake news kag nagamaniobra sang merkado.
Nagpahanumdom man si Secretary Gomez sa mga netizens nga mangin responsable sa pag-share sang impormasyon kag siguraduhon nga ma-verify ini antes ipalapta agud malikawan ang posible nga halit sa publiko.
