Ginpasiguro sang mga rice retailers ang pagbaligya nila sang bugas sa barato nga presyo ukon yara sa P45 kada kilo humalin sa bulan sang Hulyo.
Sa isa ka pagsinapol, ginpahayag ni Grain Retailers Confederation of the Philippines spokesman Orly Manuntag nga nakapreparar sila nga buligan ang gobyerno nga mapahagan-hagan ang epekto sang inflation kag mabuligan ang mga mamumugon nga mabatyagan ang epekto sang pagnubo sang taripa sa bugas.
Sa pagbanta sang rice traders, ginalauman nga ang presyo sang well-milled rice para sa Hulyo tubtob sa Agosto ang maganubo sang 25 percent ukon yara sa P45 tubtob sa P46 kada kilo.
Ang premium rice naman ang maganubo sang 5 percent ukon P47 tubtob P48 kada kilo.
Nakigkita ang Philippine Rice Industry Stakeholders Movement nga ginapangunahan nanday Manuntag kag Sadicon kay House Speaker Romualdez sang Lunes kun sa diin gindiskusyunan sang mga ini ang pamaagi agud nga mapanubo ang retail price sang bugas.
Sang Hunyo 20, gin-issue ni President Ferdinand Marcos Jr., ang isa ka Executive Order 62 para sa pagbuhin sang taripa sa mga imported nga bugas sa 15 percent nagikan sa 35 percent tubtob sa tuig 2028.
Suno sa economic managers, mahimo nga mapanubo sini ang presyo sang bugas sa P29 kada kilo.
