Wala sa karon sang pagbag-o sa presyo sang bugas sa mga merkado sa ciudad sang Bacolod bisan nagsugod na ang tag-alani samtang ginalauman naman nga magasaka ang presyo sa bulan sang Nobyembre tubtub Disyembre.
Sa interview sang Bombo Radyo kay Ronalyn Jerota nga nagabaligya sang bugas sa Sum-ag Public Market, P36 kada kilo ang pinakabarato nga bugas apang ini ang bahay.
P45 tubtub 46 naman ang presyo sang kada kilo sang Jasmine rice nga nagikan sa Vietnam.
Suno kay Jerota, mabakal ang nasambit nga variety bangud mahamot kag mahumok ini kun magbahaw.
Kalabanan naman ang nagabakal sang sinako ukon ang nagabug-at sang 10 kilos ukon 25 kilos.
P2,100 ang bili sang isa ka sako nga Jasmine rice.
Suno diri, nagikan lang sa Vietnam ang imported rice nga ila ginabaligya kag wala na sang iban nga nagikan sa iban nga pungsod.
Kada semana, 20 ka sako ang mapaubos nila nga Jasmine rice.
Suno sa rice retailer, wala sang pagbag-o sa presyo sang bugas halin sang Agusto.
Ang presyo naman sang nagikan sa Iloilo ang yara sa P40 tubtub P41, samtang ang bugas nga nagikan sa Negros ang nagabili sang P40 tubtub P42 ukon P1,600 kada sako.
Ginalauman naman nga magasaka ang presyo sang bugas kun Nobyembre tubtub Disyembre bangud madamo ang kwarta sang mga pumuluyo.
Subong, diutay pa lang ang nagapaani gani indi pa dako ang ginnubo sang presyo sang bugas.
