Nagdoble ang presyo sang bulak nga ginabaligya sa Bacolod matapos nagmahal ang kapital sini kag napierde man ang mga flower shops bangud sa delayed nga shipment kadungan sang paglabay sang Bagyo Paeng kun sa diin kanselado ang byahe sang mga barko.
Sa interview sang Bombo Radyo Bacolod kay Jenita Buenafe sang Nonoy Buenafe kiosk sa likod sang BAYS center, mahal ang ginabaligya nga bulak sa karun isa ka adlaw antes ang pag-obserbar sang tigkalalag bangud magluwas sa okasyon halos katunga sang gin-order nila nga bulak nagikan sa Benguet kag Dangwa Market sa Manila ang wala napuslan bangud napuot kasunod sang delay sang biyahe bangud sa Bagyong Paeng.
Suno kay Buenafe, nakadepende man sa supplier kun tungan sila sa ila nga kapierdehan.
Tatlo ka adlaw nga nadelay ang pagtransport sang gin-order nila nga bulak nagikan sa Benguet bangud sa Bagyo Paeng.
Suno diri ang presidential ukon flat design nga mabakal sadto sang P150 ang nagabili na subong sang P300; ang round design nga mabakal sadto sang P100 ang nagabili na subong sang P150 kag ang one-sided arrangement nga nagabili sang P200 ang nagabili na subong nga sang P500.
Suno kay Buenafe, tuman na gid kataas ang kinahanglan nila nga capital bangud ang isa ka karton sang Malaysian mums nga nagabili sadto sang P6,000 ang nagabili na subong sang P15,000.
Ginpahayag man ni Buenafe nga kun may okasyon nagasaka gid man ang presyo sang bulak.
