Lauman nga magasaka ang presyo sang firecrackers ukon palupok sa pagsugod sang baligyaanay subong nga nagahilapit ang holiday season tubtub sa pagsugata sang bag-ong tuig.
Suno kay Baylon, presidente sang Hinigaran Firecrackers Manuafacturer and Retailers Association, magasaka man ang presyo sang palupok bangod sa mataas nga preyso sang raw materials.
Ginabanta nga kapin 40 porsyento ang ginsaka sang presyo sang raw materials kaangay sang papel, karton, pulbura kag pabilo gani magsaka man ang presyo sang firecrackers.
Sa karun, ang isa ka gatos ka trayanggulo nga nagabili sang tinalikdan sang P60 ang nagabili na sang P100; ang katay ukon gamay nga judas belt ang nagabili na sang P150 nagikan sa P100 tubtub P120, samtang ang pwitis ang nagabili na sang P10 nagikan sa P7 ukon P8.
Ang nasambit nga presyohanay ang para lamang sa direkta nga nagabakal sa banwa sang Hinigaran gani lauman nga mas mahal pa gid ini kun magbakal sa gina-retail sa mga kabanwahan, lakip na diri sa ciudad sang Bacolod bangud sa transport cost.
