Nagapati ang principal nga wala nakahangop si Senate President Francis “Chiz” Escudero sa matuod nga sitwasyon sa mga eskwelahan gani gingamit sini nga halimbawa sa Rightsizing Bill ang mga principal.
Ini kasunod sang pagpahayag ni Escudero nga dapat magtudlo ang mga principal bangod instructor ang role sang ila position, kag gintawag pa ang mga ini nga naga-akto nga boss sa mga eskwelahan.
Ang Senate Bill No. 890 ukon Rightsizing Bill, ang nagatuyo nga magdula sang mga redundant positions sa government offices, nga ginalantaw sarang makasave sang P3 billion nga pondo kada tuig.
Sa interview sang Bombo Radyo Bacolod kay Leo Ceralbo, principal sang Handumanan Elementary School 2, kumpormi ini sa rightsizing bangod may-ara gid man sang mga opisina sang gobyerno nga madamo sang redundant position nga indi naman kinahanglan.
Apang ginapahanumdom sini nga antes napromote nga principal, sila ang nagtudlo man sang malawig nga tinuig.
May tion man nga sila ang nagasalo sang klase kun absent ang mga manunudlo.
Apang ang mga ini ang indi na dapat hatagan sang regular nga class schedule bangod sila ang puno na sang administrative task.
Dugang pa sini nga sila ang dugay-dugay man nga nagapatigayon sang seminars, gani indi na nila ma-ulikdan ang regular nga pagtudlo.
Suno kay Ceralbo, indi na nila matutukan ang mga problema sa eskwelahan kun dugangan pa ang ila nga load sa pagtudlo sa mga estudyante.
