BACOLOD CITY – Nagaplano ang bag-o nga acting director sang Police Regional Office 18 nga lantawon ang sitwasyon sang Negros Oriental nga ginakabig frontier ukon pinakamalapit nga bahin sang Negros sa isla sang Mindanao.
Sa exclusive interview sang Bombo Radyo Bacolod kay PRO-18 Acting Director Chief Supt. Edmund Gonzales, ginpahayag sini nga wala pa siya makabisita sa Oriental apang luyag gid sini makita ang sitwasyon didto agud usisaon ang kahandaan sini sa posibilidad sang spillover ukon ang pagpalagyo sang mga terorista gikan sa opensiba sang militar sa Mindanao.
Suno kay Gonzales, nga anay hepe sang PNP Maritime Group, ginmanduan na sini ang tanan nga units sang kapulisan sa makig-angot sa ila nga counterparts sa Philippine Coast Guard kag Philippine Navy nga nalakip sa law enforcement agencies nga nagabantay sang baybayon sang NIR gikan sa pagsulod sang anuman nga bandido ukon terorista nga grupo.
Kumpiyansa naman si Chief Supt. Gonzales nga ang eksperyensiya sini sa Maritime Group ang may daku nga mabulig sa iya sa pag-amlig sang NIR gikan sa pagsabwag sang kalakasan sang Maute Group bangud saulado sini ang mga hulag sang mga grupo sa kadagatan, lakip na ang sahi sang sakayan nga posible gamiton sang grupo nga makalambot sa isla sang Negros.
