Ginlaygayan sang International Criminal Court (ICC) Trial Chamber III Presiding Judge Joanna Korner sang Miyerkules ang Prosecution sa kaso ni anay Presidente Rodrigo Duterte crimes against humanity nga paminsaran ang pagnubo sang numero sang ila mga testigo.
Ang hukom nagpahayag nga ang prosecution ang nagpangabay sang 193 ka oras sa pagpresentar sang ila kaso, nga suno sa iya isa ka tuman ka lawig nga tion.
Ginhatagan pagtamod ni Korner nga ang prosekusyon ang may apat ka eksperto sa amo man nga topiko.
Suno pa diri nga importante nga matapos ang kaso sa labing madali nga pahanon.
Samtang, ginpahayag naman ni ICC trial lawyer Edward Jeremy nga magapangita sang oportunidad ang prosekusyon agud ma-streamline ang ila kaso.
Si Jeremy nagpahayag nga ang ila pangabay para sa 193 ka oras amo na ang reduced version.
Si Duterte, nga nagapangatubang sang kaso bangud sa ginaalegar pagpamatay sang siya ang Presidente kag alkalde sang Davao City, nagtambong sa iya status conference sa una nga kahigayunan.
Nadakpan ini sang Marso 2025 sa Ninoy Aquino International Airport Terminal 3.
Priso subong sa ICC Detention Center sa Scheveningen sa The Hague, The Netherlands ang anay presidente sang Pilipinas.
Samtang nagpahayag si Atty. Peter Haynes, ang Defense cousel ni Duterte nga nagapangita sila sang mga solusyon nahanungod sa timing sang trial kag disclosure process kag ginhatagan man pagtamod nga kun si Duterte ang mas lamharon kag mas mapagros nga kliyente, magahingyo sila nga sayluhon ang petsa sang trial sa sulod sang anum ka bulan kag sugudan liwat ang disclosure process.
Ginhatagan naman sang korte sang pito ka adlaw ang mga partido agud nga mahatagan sang sabat ang isyu.
Ang Depensa ginalauman nga mag-file sang mosyon sa masunod nga Miyerkules, samtang ang ICC Prosecutor kag Senior Trial Lawyer nga si Julian Nicholls may pito ka adlaw sa pagsabat.
