Ginkumpirmar sang provincial director sang Negros Occidental Police Provincial Office nga nagsumiter na ini sang courtesy resignation kasunod sang apela ni Interior Secretary Benhur Abalos.
Suno kay Police Col. Leo Pamittan, bilang nagaisahanon nga police colonel sa Negros Occidental, nagsabat ini sa panawagan ni Abalos, kaupod ang iban pa nga police colonel sa bilog nga Western Visayas, agud mapatigayon ang internal cleansing.
Suno diri, nagakooperar sila sa tikang ni Abalos gani personal sila nga nagcomply sa iya nga panawagan paagi sa pagpasa sang undertaking.
Suno diri, bukas sila sa anuman nga imbestigasyon nga patigayunon agud mahibaluan kun sin-o ang imbolbado sa illegal drug trade paagi sa pag-usisa nga patigayunon sang isa ka body nga gintukod sang SILG.
Ginpasalig ni Pamittan nga ginasuportahan nila ang tikang sang PNP chief kag Police Regional Office 6 director Police Brigadier General Leo Francisco sa pagpanguna sa pagsumiter sang courtesy resignation.
Suportado man sini ang tikang sang tiglikom sang Department of the Interior and Local Government nga limpyuhan ang ngalan sang Philippine National Police.
Ila ginakondenar ang ginahimo sang mga police officers nga nagamantsa sang ngalan sang PNP kag siya ang nagalaom nga manabat ang mga ini.
Suno kay Pamittan, himuon nila ang tanan nga masarangan agud nga malimpyuhan ang ngalan sang organisasyon nga ila ginserbehan sa malawig nga panahon.
