Padayon ang panawagan sang Provincial Disaster Management Program Division sa mga pumuluyo sang Negros Occidental nga mag-aligmat sa epekto sang pag-ulan dala sang Low Pressure Area.
Suno kay Dr. Zeaphard Gerhart Caelian, pinuno sang Provincial Disaster Management Program Division, medyo mainit ang temperatura sa ibabaw sang kadagatan sa Mindanao gani madugay matunaw ang Low Pressure Area, apang ini ang magadissipate kun indi magdevelop bilang bagyo.
Suno diri, maulanon gid man ang panahon kun bulan sang Enero kag ginalauman nga magaayo na ang panahon pag-abot sang bulan sang Pebrero.
Sa karon, yara sa blue alert status ang mga local disaster risk reduction and management offices sa Negros Occidental bilang preparasyon sa epekto sang padayon nga pag-ulan.
Suno diri, indi dapat mangin complacent ang mga pumuluyo nga wala na sang ulan kundi padayunon lang ang pag-aligmat sa pag-ulan.
Ginahulat pa man ang report nagikan sa local government units angot sa epekto sang Low Pressure Area apang nakapadala na sang report ang San Carlos DRRMO nga naclear na ang dalan nga ginluntaran sang rockslide kaina sang aga.
