Kadungan sang pagsaka sang numero sang mga bomb threat sa mga eskwelahan, nagpanugyan ang pinuno sang Provincial Explosive and Ordnance Disposal Team & K9 Unit nga indi magpanic kun may nadiparahan nga makaduluda nga baggage.
Sa interview sang Bombo Radyo kay Police Capt. Alberto Sardua, gin-ako sini nga nagdamo ang mga eskwelahan nga nagtawag sa ila kag nagpahibalo angot sa nabaton nga bomb threat.
Ginalantaw ni Sardua nga nagdamo ang bomb threat diri sa probinsya subong bangud ginasunod man ini sang iban nga estudyante sa ila nga makita nga nagakatabo sa iban nga lugar.
Sa tion nga makabaton sang kaangay nga threat suno kay Sardua, indi dapat magpanic kundi manawag sa ila agud nga mavalidate gilayon ang veracity sang report samtang nagapadayon ang klase.
Kun wala man lang sang nanotisyaran nga makaduluda nga baggage sa sulod sang classroom, mas luwas suno sa iya kun magpabilin ang mga estudyante sa sulod sang classroom sangsa pagwaon ang mga ini bangud mahimo nga kun may bomba gid man, yara ini sa gwa.
Suno kay Sardua, sila na ang bahala magsanitize sang lugar samtang nagapadayon ang klase agud indi na magtuga sang panic.
Sa tion naman nga may makita nga suspicious baggage, indi magpalapit diri agud magkuha sang picture kundi pahibaluon gilayon ang otoridad.
